ട്രെയിന്‍ കാത്തുനില്‍ക്കുന്നവര്‍

ഏകാന്തതയുടെ ഒറ്റതുരുത്തുപോലെ ,

രാത്രിയില്‍, മങ്ങിയ വെളിച്ചത്ത്

ആളൊഴിഞ്ഞുതുടങ്ങുന്നൊരു

ചെറു റെയില്‍വേ സ്റ്റേഷന്‍....

നിര്‍ത്താതെ പാഞ്ഞുപോകുന്ന

തിരക്കുള്ള തീവണ്ടികളോരോന്നും

അമ്പരപ്പോടെ നോക്കുന്നത്...;

ഒഴിഞ്ഞ സിമന്റ്‌ ബെഞ്ചിനരുകില്‍

ഒറ്റയ്ക്കനങ്ങാതെ ട്രെയിന്‍

കാത്തുനില്‍ക്കുന്ന ഒരാളിലേക്കാണ്....!

കിതച്ചുവന്നു നില്‍ക്കുന്ന വണ്ടികളുടെ

മുരള്‍ച്ചകള്‍ അയാളുടെ മൌനത്തില്‍

മുങ്ങിപോകുന്നു......!

പാളങ്ങളെ വിറപ്പിക്കുന്ന

വേഗതകള്‍ , അയാളുടെ നിശ്ചേഷ്ടതയിലേക്ക്

ഊറി ഊറി നിശ്ചലമാകുന്നു.....!!

തിങ്ങിനിറഞ്ഞ ബോഗികളിലെ

തിടുക്കങ്ങളെല്ലാം അയാള്‍ക്കു ചുറ്റും

പടരുന്ന ഏകാന്തതയിലേക്ക് അലിഞ്ഞുതീരുന്നു.........!!!

തിരക്കുള്ള ബോഗികളില്‍ ഒറ്റപെട്ടുപോയ

ചില ജാലകക്കണ്ണുകള്‍ മാത്രം....

തിരിച്ചറിയുവാനാകാത്തവിധം ഉറഞ്ഞുപോയ

വികാരങ്ങളെ വായിച്ചെടുക്കുന്നുണ്ട്..;

നിര്‍ത്തുന്ന ട്രെയിനുകളില്‍ ഒന്നും കയറാതെ ,

ഒറ്റയ്ക്കനങ്ങാതെ , മൂകമായ്

പ്ലാറ്റ്ഫോമില്‍ ഒരു മൂലയില്‍

ഒരോര്‍മ്മതെറ്റുപോലെ

അയാള്‍ ട്രെയിന്‍ കാത്തു നില്‍ക്കുന്നു...!!!

ഇരുട്ടൊന്നു കനത്ത് ,

ആളെല്ലാം ഒഴിയുമ്പോള്‍ ,

പ്ലാറ്റ്ഫോമിന്‍റെ ഒരറ്റത്തേക്ക്‌

ഏറെ ദൂരം നടന്ന്,

താഴേക്കിറങ്ങി

ഒറ്റയ്ക്കനങ്ങാതെ നിശബ്ദതമായ് ,

അയാള്‍; അയാള്‍ മാത്രം

പാളങ്ങളില്‍ തല വെച്ച്

 ട്രെയിന്‍ കാത്തു കിടക്കുന്നു...!!!!

മരുഭൂമിയിലെ മരങ്ങള്‍

പച്ചപ്പില്‍ നിന്ന് പറിച്ചു നട്ട്

മരുഭൂമിയില്‍ ഒറ്റപ്പെട്ടുപോയൊരു മരം ,

കിളിയൊച്ചകള്‍ക്കും ഇലയനക്കങ്ങള്‍ക്കും

കാത്തിരിക്കുന്നില്ല....!!

കിളിക്കൂടും, തളിരും, കുളിരുന്ന

മഴകളും ഇപ്പോള്‍ സ്വപ്നം കാണാറുമില്ല.......!!

ശൂന്യതയിലേക്ക് നീട്ടിയ ചില്ലകള്‍

പോലും വെട്ടിമുറിച്ചൊതുക്കപ്പെട്ടിരിക്കുന്നു ,

വെയില്‍ പൊള്ളിച്ചു  വിണ്ടുകീറിയ

ഉടലില്‍ കുടുങ്ങുന്നത് വരണ്ടുപോയ ആത്മാവ് ,

വേരുകളുടെ ആഴങ്ങള്‍ക്ക് കൃത്യമായ

അതിര്‍ത്തികള്‍ കുറിക്കപ്പെട്ടിരിക്കുന്നു.....

വേരുകള്‍ പിഴുത് ഒഴുകാന്‍

ഒരുങ്ങുമ്പോളാണ് ,

വേരറുക്കാന്‍ കൊടുംകാറ്റും

നിലയില്ലാതൊഴുകുവാന്‍

ഒരു പ്രളയവും വേണമെന്നറിയുന്നത്....!!

സ്വയം ഒടുങ്ങുവാന്‍ ആകാത്ത

നിസ്സഹായത ഉള്ളില്‍ പടരുമ്പൊളും ,

തണ്ടില്‍ ഇഴയുന്ന ജീവന്റെ

അവസാന കണികയും അടര്‍ത്തിമാറ്റീടുവാന്‍

മരം തപസിലാണ് …

വിടരാന്‍ മടിക്കുന്ന പച്ച വറ്റിയ

ഇലനാമ്പുകളൊന്നില്‍  ഗൂഢാക്ഷരങ്ങളില്‍

മരമൊരു ശാപം കുറിച്ചുവെച്ചിട്ടുണ്ട്....!!

ആ ഇല നിലംപതിക്കുന്ന നാളാകും

മരുഭൂമിയില്‍ പ്രളയമുണ്ടാകുന്നതും

ജീവനുകളൊന്നായി ഒലിച്ചുപോകുന്നതും…..!!!